इभिडिओको थ्रिजी इन्टरनेट पश्चिम क्षेत्रमा पनि

नागरिक दैनिक, बिहीबार १७ श्रावण, २०७०सन्तोष पोखरेल

पोखरा— नेपाल टेलिकमले आइपिसिडिएमए प्रविधिमा आधारित इन्टरनेट सेवा प्याकेजमा उपलब्ध गराउन थालेको छ। पोखरा र आसपास क्षेत्रमा बुधबारदेखि बिक्री थालिएको यो प्रविधिबाट तेस्रो पुस्ता (थ्रिजी) को इन्टरनेट चलाउन सकिने टेलिकमले जनाएको छ। पुरानो प्रविधि विस्थापन गरेको टेलिकमले डाटा प्याकेजमा युएसबी डोंगोलसहित प्याकेज उपलब्ध गराउन थालेको बुधबार आयोजित पत्रकार भेटघाटमा वायरलेस सेवाका नायब प्रबन्ध निर्देशक अनुपरञ्जन भट्टराईले जानकारी दिए। 'इभिडिओ सेवामार्फत भ्वाइस सेवाको अतिरिक्त ३.१ एमबिपिएस डाउनलोड क्षमतामा इन्टरनेट चलाउन सकिन्छ,' भट्टराईले भने, 'यो निकै प्रभावकारी बन्दै गएको छ।' टेलिकमले गत वैशाखदेखि पोखरा र आसपासमा डाटाकार्ड बिना इभिडिओ सेवा बिक्री गरिरहेको थियो।

टेलिकमले डाटा प्याकेज बिक्री थालेको अवसर पारेर यसका प्रयोगकर्तालाई छुट योजना अघि सारेको छ । भट्टराईका अनुसार डाटाकार्ड सहित उपलब्ध हुने यो सेवामा ग्राकहले २ हजार ३ सय ५९ रुपैयाँ तिरेपछि ५ जिबी डाटा पाउँछन् । त्यससँगै १ जिबीको मेमोरीकार्ड, १ सय रुपैयाँको 'टकभ्यालु'को सुविधा पाउनेछन् । ५ जिबी डाटाको समय तीन महिना हुने उनले जानकारी दिए । 'यसको वास्तविक मूल्य करिब ५ हजार रुपैयाँ पर्छ, तर शुभारम्भको अवसरमा विशेष छुट दिएका हौं,' उनले भने । बजारमा हाल बिक्री भइरहेका यस्तै सेवामध्ये टेलिकमले ल्याएको यो प्याकेज सबैभन्दा सस्तो भएको उनले दाबी गरे । 'अरु कम्पनीको भन्दा यसको मूल्य निकै सस्तो छ । अहिले एक मेगाबाइटको मूल्य ५० पैसा पर्छ । सबै कम्पनीले यति सस्तोमा यो सेवा दिन सकेका छैनन्,' उनले भने । आइपिसिडिएमए प्रविधिको सेवा अहिलेसम्म देशका ४५ जिल्लामा सञ्चालनमा आएको टेलिकमले जनाएको छ । आगामी दसैंभित्र मुलुकभर पहुँच पु¥याउने टेलिकमका भट्टराईले जानकारी दिए । यसले नेपालको डिजिटल डिभाइड कम गर्न योगदान पुर्या उने भट्टराईले बताए ।

टेलिकमले यसको सेवा बिस्तार गर्न पुरानो प्रविधिमा आधारित बिटिएस विस्थापन गरी नयाँ प्रयोगमा ल्याएको छ । सबै गाविस र क्षेत्रमा गुणस्तरीय सेवा प्रदान गर्न नयाँ प्रविधि भिœयाएको टेलिकम पोखराका प्रमुख प्रकाशमान प्रधानले बताए । 'दु्रत गतिको इन्टरनेट सेवा दिनेसहित कुराकानीको गुणस्तर वृद्धि गर्न यो प्रविधि भिœयाएका हौं,' उनले भने, 'अब सबै गाउँमा गुणस्तरीय इन्टरनेट सेवा दिन सकिन्छ । धेरैजनाले इन्टरनेटको गति सुस्त भएको गुनासो गरिरहेकोमा यो प्रविधिले उनीहरुको मागसम्बोधन गर्छ ।' वातावरणमैत्री र कम पावर खपत गर्ने यसका टावरले लोडसेडिङमा पनि गुणस्तरमा समस्या आउन नदिने वरिष्ठ इन्जिनियर सन्तोष शर्माले बताए । 'पुराना बिटिएसले निकै धेरै पावर खपत गर्दा समस्या थियो,' उनले भने, 'तर नयाँमा यो समस्या आउने छैन । लोडसेडिङमा पनि यसमा समस्या आउँदैन ।' टेलिकमले इभिडिओ सेवालाई 'स्काई प्रो'को नाममा बिक्री गरिरहेको छ ।

इभिडिओमा आकर्षण छ : अनुपरञ्जन भट्टराई, नायब प्रबन्ध निर्देशक (वायरलेस इन्टरनेट सेवा)

इभिडिओ थ्रिजी इन्टरनेट सेवा कस्तो प्रविधि हो ?

यो प्रविधि वायरलेस इन्टरनेट प्रविधिमा आधारित छ । डाटा कार्डमा रिमकार्ड राखेर इन्टरनेट चलाउन सकिने यो प्रविधि तीव्र गतिमा इन्टरनेट चलाउन चाहने प्रयोकर्ताका लागि ल्याएका हौं । टेलिकमले यसअघि डाटाकार्ड बिनाको प्रविधि मात्र भित्र्याएको थियो । प्रयोगकर्तालाई गुणस्तरीय सेवा दिन बन्डलिङसहितको सुविधा सुरु गरेका छौं ।

यो सेवा कुन वर्ग लक्षित छ ?

गाउँगाउँमा बस्ने र डाँडाकाँडामा पुगेर तीव्र गतिको इन्टरनेट चलाउन चाहने प्रयोगकर्तालाई हामीले लक्षित वर्ग ठानेका छौ । गाउँमा थ्रिजी प्रविधिको इन्टरनेट चलाउन अहिलेसम्म कुनै विकल्प थिएन । अहिले पनि हामी एक्लै छौ । गाउँमा बसीबसी पनि अब प्रयोगकर्ताले भिडियो च्याट गर्न सक्छन् ।

मूल्य कस्तो छ ?

वायरलेस थ्रिजी इन्टरनेट प्रविधिमा यो सबैभन्दा सस्तो छ । हामीले एक मेगाबाइटको मूल्य ५० पैसा तोकेका छौं । सबै कम्पनीले यति सस्तोमा यो सेवा दिन सकेका छैनन् । त्यसैले गाउँका बासिन्दाका लागि पनि सहज छ । शुभारम्भ प्याकेजमा पनि हामीले ५० प्रतिशतभन्दा बढी छुट दिएका छौं । ५ हजार रुपैयाँ जति पर्ने ५ जिबीको प्याकेज डोंगोलसहित २ हजार ३ सय ५९ रुपैयाँमा उपलब्ध गराएका छौं । यसमा १ जिबीको मेमोरी कार्ड, १ सय रुपैयाँको 'टकभ्यालु' पनि सित्तैमा पाइन्छ । ५ जिबी डाटाको समय तीन महिना हुन्छ ।

राजधानीमा सुरु भइसकेको यो सेवाप्रति ग्राहकको प्रतिक्रिया कस्तो छ ?

राजधानीमा दुईवटा शिक्षा मेलामा यो बेच्यौं । त्यसमा देखिएको ग्राहकको आकर्षण र सकारात्मक प्रतिक्रियाबाट उत्साहित भएर राजधानीबाहिर पनि सेवा विस्तार गरेका हौं।